Breaking News
Home / World / ટ્રમ્‍પ રાષ્‍ટ્રપતિ બનતા જ લાખો ભારતીયોએ છોડવું પડશે અમેરિકા? આઘાતજનક સમાચાર : અઢી લાખ ગુજરાતીઓ ઉપર થશે ‘સર્જિકલ સ્‍ટ્રાઇક’

ટ્રમ્‍પ રાષ્‍ટ્રપતિ બનતા જ લાખો ભારતીયોએ છોડવું પડશે અમેરિકા? આઘાતજનક સમાચાર : અઢી લાખ ગુજરાતીઓ ઉપર થશે ‘સર્જિકલ સ્‍ટ્રાઇક’

 

વોશિંગ્‍ટન તા. ૧૯ : અમેરિકાના પ્રમુખપદે ડોનાલ્‍ડ ટ્રમ્‍પની શપથવિધીનું કાઉન્‍ટડાઉન શરૂ થઈ ગયું છે. ટ્રમ્‍પ કાલે પ્રમુખપદ સંભાળશે. ત્‍યારે અમેરિકામાં રહેતા ભારતીયો માટે એક આઘાતજનક સમાચાર આવી રહ્યા છે.

ટ્રમ્‍પે પોતાનો પહેલા ૧૦૦ દિવસનો એજન્‍ડા નક્કી કર્યો છે, તેમાં અમેરિકામાં ગેરકાયદેસર રહેતા લોકોને પોતાના વતન પાછા મોકલી દેવાનો એજન્‍ડા ટોપ પર છે. અમેરિકામાં ગેરકાયદે વસતા ભારતીયોની સંખ્‍યા ઘણી મોટી છે, જેમને ફરજિયાત પણે અમેરિકા છોડવું પડી શકે છે. છેલ્લા પાંચ વર્ષમાં અમેરિકામાં ગેરકાયદેસર રીતે રહેતા ભારતીયોની સંખ્‍યામાં લગભગ પચાસ ટકાનો વધારો થયો છે.

અમેરિકામાં ગેરકાદેસર રીતે રહેતા ભારતીયોમાં મોટા ભાગના અનસ્‍કીલ્‍ડ છે અને નાનાં નાનાં કામ કરીને ટકી રહ્યા છે. તેમાં અઢી લાખથી વધુ ગુજરાતીઓ છે.

ટ્રમ્‍પે ગયા વર્ષે પેન્‍સિલ્‍વેનિયાના ગેટિસબર્ગમાં આપેલા પ્રવચનમાં પ્રેસિડન્‍ટ બન્‍યાના પ્રથમ ૧૦૦ દિવસનો એજન્‍ડા લોકો સામે જાહેર કર્યો હતો. જેમાં કહ્યું હતું કે, પ્રમુખપદના શપથ લીધા બાદ પોતે સૌથી પહેલાં તો અમેરિકામાં ગેરકાયદે વસતા ૨૦ લાખ લોકોને બહાર કરવાનું શરૂ કરશે.

ટ્રમ્‍પે એ પણ સ્‍પષ્ટ કર્યું હતું કે, જે દેશ પોતાના નાગરિકોને પાછા લેવાનો ઈનકાર કરશે તે દેશ પર વિઝા નિયંત્રણો મૂકી દેવાશે.. અમેરિકામાં હાલમાં ૫ લાખ ભારતીયો ગેરકાયદેસર રીતે રહે છે. અમેરિકામાં ગેરકાયદેસર રહેતા લોકોમાં મેક્‍સિકન્‍સની સંખ્‍યા સૌથી વધારે છે, પણ છેલ્લાં વર્ષોમાં ભારતીયોની સંખ્‍યામાં જંગી વધારો થયો છે.

ટ્રમ્‍પ પ્રથમ દિવસે વ્‍હાઈટ હાઉસમાં પોતાના એજન્‍ડાના અમલ માટે શું કરવું તેની ચર્ચા કરશે. ટ્રમ્‍પે સંકેત આપ્‍યા છે કે પહેલા દિવસે એ પોતે ઓબામાકેયર યોજના બંધ કરશે.

આ ઉપરાંત ટ્રમ્‍પ બરાક ઓબામાના સંખ્‍યાબંધ સરકારી ઓર્ડરને રદ કરશે. આ ઉપરાંત ચીનને કરન્‍સી મેનીપુલેટર (મુદ્રાની હેરાફેરી કરનારો દેશ) જાહેર કરવામાં આવશે. ટ્રમ્‍પે કહ્યું હતું કે ‘પ્રથમ દિવસથી જ પરિવર્તન લાવવાનું શરૂ કરીશ, દરેક ગેરકાનુની ઓર્ડરને રદ કરી કાયદાને મજબૂત કરીશ’

જો ટ્રમ્‍પ ખરેખર પોતાના કહ્યા મુજબ ચાલશે તો અમેરિકામાં ગેરકાયદે વસતા ભારતીયો સહિતના વિદેશીઓના માથે મોટું સંકટ ઊભું થઈ શકે છે એટલું જ નહીં જો ટ્રમ્‍પે કહ્યું છે તે મુજબની નીતિઓ પર આગળ વધશે, તો અમેરિકા સહિત વિશ્વભરના તેના પડઘા પડશે તે નિશ્વિત છે.

About admin

Check Also

છત્રી વગર અને રિચાર્જ પણ નહિ કરવાનું, માત્ર 1200 રૂપિયાના આ સેટઅપ બોક્સમાં TV અને ઇન્ટરનેટ ચાલશે

મિત્રો ડીશ ટીવીના મોંઘા રિચાર્જને હવે ભૂલી જાવ. માર્કેટમાંફ્રી ટીવી ચેનલ્સ જોવા માટે નવું સેટ ટોપ બોક્સ …